ETE azpikontratistentzako erreferentziazko foroa, Subcontratación, bueltan da

2023ko ekainaren 6tik 8ra bitartean egingo da, +INDUSTRY azokaren baitan

Negozioa egin, kontaktuak handitu eta beren garapenean aurrera egin nahi duten ETE azpikontratistek hitzordua dute ekainaren 6 eta 8 bitartean Bilbao Exhibition Centren SUBCONTRATACIÓN 2023 azokarekin. Fabrikaziorako Prozesuen eta Ekipamenduen Nazioarteko Azokak gune berean bateratuko ditu erakusketa eta lehen lerroko erosleekin egindako B2B elkarrizketen programa. Fabrikazio aurreratuaren baitan Estatuko eta nazioarteko esparruan erreferentziazko foro bihurtzera eramango duen kontzeptu bereizgarria da hori.

SUBCONTRATACIÓN ataleko erakusketarako gunea fabrikazio-prozesuez arduratzen diren enpresen eta, besteak beste, lan hauek egiten dituzten enpresen artean banatuko da: fundizioa, piezen eta moldeen mekanizazioa, azaleko estaldurak, tratamenduak eta prototipaketak. Horri esker, prozesu oinarrizkoenak, teknologia aurreratuenak eta fabrikazioko prozesu osoak egongo dira ordezkatuta.

Horiek guztiek Azpikontratazio Industrialeko Europako XX. Topaketan parte hartu ahal izango dute. Bezero nagusien jarduera-sektore guztiak bilduko dira bertan: trengintza, energia, siderurgia, teknika medikoak, etxetresna elektrikoak, automobilgintza eta petrokimika. Topaketa Bartzelonako Merkataritza Ganberak antolatu du Bilboko Ganberarekin eta Bilbao Exhibition Centrerekin batera Espainiako merkataritza-ganberekin elkarlanean, eta aurrez hitzartutako B2B elkarrizketen herrialdeko foro nagusietako bat da. Izan ere, edizio bakoitzean, mila elkarrizketa inguru egiten dituzte.

+ INDUSTRY, AUKERAK BIDERKATZEKO AZOKAK BATZEN

Aurreko bi edizioetako eskemari jarraituz, SUBCONTRATACIÓN azoka +INDUSTRYren baitan egingo da. +INDUSTRY herrialdeko fabrikazio aurreratuaren eta Industria 4.0ren topagune nagusietako bat da. BECeko pabilioietan aldi berean eta espazio berean bat egingo diren azokak: aipatu berri dugun SUBCONTRATACIÓN azoka, ADDIT3D, Fabrikazio Aditiboko eta 3D Inprimaketako Nazioarteko Azoka; BeDIGITAL, Transforming Industry; MAINTENANCE, Mantentze Industrialaren Nazioarteko Azoka; eta PUMPS&VALVES, Industria Prozesuetarako Ponpen, Balbulen eta Ekipamenduko Sistemen Nazioarteko Azoka.